Aksidenti në Singapor, Lauda, Villeneuve e Hill: Faji i Vettel

Aksidenti në Singapor, Lauda, Villeneuve e Hill: Faji i Vettel

Pas superioritetit të dukshëm të shfaqur të shtunën në mbrëmje nga Sebastian Vettel, në provat zyrtare për Çmimin e Madh të Singaporit, ishte thuajse e sigurtë që himni gjerman do të shoqëronte fillimin e festës për fitoren e pestë sezonale të pilotit nga Heppenheim.

Por festa faktikisht nisi me një tjetër himn, atë për fitoren e shtatë sezonale të Leëis Hamilton dhe të katërtën në këtë pistë, në fund të një gare tejet të gjatë prej mbi 2 orësh, si për shkak të reshjeve të shiut, ashtu edhe për futjen disa herë të makinës së sigurisë që ngadalësoi ritmin e garës, që fatkeqësisht zgjati shumë pak për Ferrarin.

Gara për Kimi Raikkonen përfundoi në fundin e kthesës së parë, ndërsa jo e Sebastian Vettel zgjati pak metra më shumë, mjaftueshëm për njëvendëshen me numrin 5 sa për të marrë kthesën e tretë me një kthesë të papritur 180 gradë dhe për t’u dorëzuar përfundimisht pak më tutje.

“Nuk besoj se ekziston dikush që dëshiron ta mbyllë garën kaq herët”, u shpreh piloti gjerman i Ferrarit të shtunën në mbrëmje, për reporterët që e pyesnin nëse ishte i shqetësuar pas asaj situate kur u gjend mes Verstappenit dhe Ricciardos, dy pilotë që në këtë Botëror të Formulës 1 përpiqen të gjejnë vetëm disa ditë të lumtura. Por, për fatin e tij të keq, shkoi kështu si shkoi.

Ajo çfarë ndodhi, më mirë e lëmë sipas përshkrimit që ka bërë FIA në komunikatën e shpërndarë, pasi shqyrtoi rastin, me një juri të përbërë nga Emanuele Pirro, Silvia Bellot, Gerd Ennser dhe Nish Shetty.

“Raikkonen pati një nisje të mirë dhe ishte në gjendje të parakalonte Verstappenin nga e majta (shumë pranë murit kufizues). Vettel pati një nisje më të ngadalshme, u spostua në të majtë, aty ku Ferrari i Kimit dhe Red Bulli i Max Verstappenit u prekën me njëra-tjetrën, duke përfshirë në këtë aksident edhe njëvendëshen e Sebastian Vettel dhe McLarenin e Alonsos”.

Një verdikt i vështirë për t’u pranuar nga tifozët e Ferrarit, por me të cilin kanë rënë dakord edhe legjenda të sportit më të ndjekur të automobilizmit, si Niki Lauda, Villeneuve dhe Damon Hill. Përfundimi, i thënë me fjalë të tjera, është se “faji mbetet i Vettelit”.